脫髮嘅成因有好多，除咗同遺傳有關，亦可能因為用咗唔適合嘅洗頭水，或太多造型產品等外在因素，都會令脫髮問題變得嚴重，除咗外來因素，內在因素亦同脫髮問題有關。
中醫角度，內在因素當然同體質有關，原來有三種體質嘅人係比較易有脫髮問題，首先係肝腎虛弱型，呢類人士嘅脫髮問題主要係先天原因，脫髮問題可能喺青春期已經開始出現，同時髮質較幼、易斷、髮量少、欠缺光澤，想改善肝腎虛弱型嘅脫髮，可以試下飲用養髮烏雞湯滋養肝腎。
第二種係血虛型，血虛型脫髮主要出現喺女士身上，脫髮量突然增加，頭皮屑如粉狀，同時有手凍腳凍、月經不調、皮膚乾燥敏感問題，脫髮問題主要係30歲後出現，想改善血虛體質，可以試下用黑豆合桃煲粥，可以補充血氣。
第三種係肝鬱濕熱型脫髮，呢種脫髮主要同日常生活習慣有關，如果睡眠質素欠佳，食無定時定量，又鍾意食煎炸辛辣食物，會令頭皮油脂分泌增加，頭髮容易變得油膩、頭皮屑如塊狀、頭皮痕癢、頭髮毛孔堵塞致令頭髮脫落，除改善生活習慣外，亦可進食赤小豆去濕湯改善體質。
每日大概甩50至100條頭髮都屬於正常，但頭髮及頭皮亦會因身體狀況改變而變得不穩定，了解脫髮成因，對症下藥，脫髮問題亦能有所改善！
.jpg)
Comments