洗完頭髮唔吹乾小心頭痛脫髮找上門

好多女士頭髮又長又厚，洗頭後吹乾頭髮要花費相當長時間，有時候太攰或太夜，可能冇吹乾頭髮就瞓，但長輩成日話唔吹乾頭髮就瞓，好容易會頭痛！老咗你就知味道！

中醫認為頭頂係「諸陽之會」，係人體所有經脈血管都會通過嘅地方，如果洗頭後唔吹乾頭髮，頭皮毛孔張開，風、寒、濕容易由頭部進入身體，即使未老，亦容易引起頭痛、偏頭痛、肩膊痛、頸痛等問題，而且容易感冒。

另外，濕髮睡覺亦會令頭皮滋生細菌，容易有頭皮痕癢、頭瘡等頭部皮膚問題，氣血循環受影響亦會導致脫髮，加上細菌滋生，長期可能會有禿頭危機。

洗頭後唔盡快吹乾頭髮，膽經易受寒氣、濕氣入侵，膽經失調會造成女性月經不調、經痛、經期時容易頭痛等問題。

如果你有頭痛、偏頭痛等問題，建議洗頭後盡量以毛巾擦乾頭髮，並以暖風盡快將頭髮吹乾，同時可以揉按風池穴、百會穴、或以暖包熱敷後頸，有助促進氣血循環，減輕頭痛不適。