中醫經常都會提到「腎」，中醫角度指嘅「腎」同西醫有所不同，中醫所指嘅唔單止係腎臟呢一個器冠，而係管轄人體嘅生殖器冠同泌尿系統，更加係人體五臟嘅核心，如果發現有腰痠背痛、月經週期唔規律、容易脫髮、面色變差，亦可能係腎虛嘅表現，唔單止男士擔心腎虛，女士有腎虛問題除咗有不孕問題，仲有皮膚欠缺光澤，顯老而且易肥。
想腎氣充足，最直接嘅方法就係改變飲食習慣，即使先天體質好，或認為年輕就唔會有腎虛問題，但長期好食生冷，經常嗜食辛辣肥厚食物，等於任由唔好嘅物質進入體內，長時間後亦會出現後天失調嘅腎虛症狀。
多做腰腹及下半身運動，可以促進下半身血液循環，將氣血帶到離心臟較遠嘅下肢，有助舒緩腰痠背痛，而多郁動腰腹，有溫暖腎臟同補腎氣嘅效果。雖然運動係好，但過度劇烈亦有損健康，平日亦可以多刺激腳底湧泉穴，亦有強身健體嘅功效。
中醫講求陰陽平衡，日間有充足運動之餘，晚間亦要有充足嘅睡眠，先可以令身體自我修復，想腎氣充足，千萬要避免過累同熬夜，休息時讓身體同腦袋徹底放鬆。傍晚五點至七點係腎經最旺嘅時間，放工時間當然最適宜多休息，同埋按摩腎經，有助強化腎經，幫助排出廢物。
.jpg)
Comments